कार्तिक पोर्णिमा

आज कार्तिक पोर्णिमा घ्या योग्य मुहूर्तावर कार्तिकस्वामींचे दर्शन...

...श्रीशिवपार्वतीचे ज्येष्ठ चिरंजीव, श्रीगजानानचे ज्येष्ठ भ्राता श्रीकार्तिकेय अर्थात कार्तिकस्वामी यांच्या दर्शनाचा योग यंदा बुधवार, दिनांक २५ नोव्हेंबर २०१५ रोजी सकाळी ७ वाजून ३७ मिनिटांपासून ते दुसरे दिवशी म्हणजे उजाडता गुरुवार, २६ तारखेच्या पहाटे रात्री ४ वाजून १४ मिनिटांपर्यंत आहे.

...“कार्तिक महिना, पौर्णिमा आणि कृत्तिका नक्षत्र” या तीन गोष्टी जेव्हा एकत्र येतात, तेव्हा म्हणजे कार्तिक पौर्णिमेच्या दिवशी ज्या काळात कृत्तिका नक्षत्र असेल, तेव्हा श्रीकार्तिकेयाचे दर्शन घेण्याचा शुभकाल मानला जातो.

...श्रीकार्तिकेय हे बल,बुद्धी, साहस आणि यशाचे प्रतिक मानले गेले आहे. तो शिवगणांचा सेनापती मानला जातो. त्यामुळे ज्ञानसंपन्नता, यशस्विता आणि इतर सर्व शुभगुणांचे अधिपत्य श्रीकार्तिकेयाकडे आहे. वर वर्णन केलेल्या पर्वणीकाळात त्याचे दर्शन घेणे, हे "धनसंपत्तीकारक"ही मानले गेले आहे.

...कार्तिकस्वामींचे दर्शन घेतल्यानंतर आगामी संपूर्ण वर्ष हे धनलाभाचे जाते, असा माझ्यासह अनेकांचा वर्षानुवर्षाचा अनुभव आहे. आर्थिक अडचणीत, कर्जात बुडालेल्या व्यक्तींनी या पर्वणीकाळात अवश्य दर्शन घेऊन प्रार्थना केल्यास आगामी वर्ष हे आर्थिक लाभाचे जाते, असा समज आहे. श्रद्धा असेल तर हा अनुभव नक्कीच येतो.

दर्भ अर्पण करण्याची प्रथा आहे. अनेक भक्त प्रतिकात्मक पातळीवर सोने (सुवर्ण-Gold) देखील अर्पण करतात. ( हे प्रतिकात्मक अर्पण असल्याने ते किमान १०० मिलीग्रॅम असले तरी चालते.) दर्शनाचे वेळी अत्यंत भक्तिभावाने दर्शन घेऊन, वरीलपैकी शक्य असतील, त्या वस्तू अर्पण करावे आणि अपेक्षित प्रार्थना करावी.

...दर्शनाच्या वेळी कार्तिकस्वामींच्या २८ नावांचा उल्लेख असलेले "प्रज्ञाविवर्धन स्तोत्रा"चे पाठ केल्यास अधिक उत्तम. विशेषतः विद्यार्थीदशेतील मंडळींनी प्रज्ञाविवर्धन स्तोत्राचे पाठ करून कार्तिकेयाचे दर्शन घेणे अधिक लाभदायक मानले गेले आहे. (विद्याप्राप्ती व शैक्षणिक यशासाठी हे पर्वणी दर्शन खूप शुभ असते.)

...सकाळी उठून स्नान, दैनंदिन पूजाअर्चा करून, आईवडील, गुरूंना नमस्कार करून, शुचिर्भूतपणे दर्शन घ्यावे. वरीलपैकी शक्य असतील, त्या गोष्टी अर्पण कराव्यात. प्रज्ञाविवर्धन स्तोत्राचे पाठ जमतील तसे करावेत. त्या दिवशी मद्यपान, मांसाहार अर्थातच कटाक्षाने वर्ज्य करावा. ब्रह्मचर्यपालनही करावे.

दिनांक २५ नोव्हेंबर २०१५ रोजी दर्शन पर्वणीकाळ हा सकाळी ७.३७ ते दुसरे दिवशी पहाटे ४.१४ आहे तरी त्यातही शुभ चौघडीया पुढील आहेत.

७.३७ ते दुसरे दिवशी पहाटे ४.१४ आहे तरी त्यातही शुभ चौघडीया पुढील आहेत.

सकाळी ७.३७ ते ९.३१ लाभ आणि अमृतकाळ

सकाळी १०.५२ ते दुपारी १२.१४ शुभकाळ

संध्याकाळी ४.१८ ते ५.३९ लाभकाळ

संध्याकाळी ७.१८ ते मध्यरात्री ००.१४ शुभ-अमृत

तुमच्या विभागातील कार्तिकेयांच्या मंदिरांचा शोध घ्यावा

पालघर व आसपासच्या परिसरात भवानगड (केळवे), वसई (निर्मळ) या परिसरात कार्तिकेयांची देवळे आहेत. पुण्याला पर्वतीवर, कोल्हापुरला महालक्ष्मी मंदिरालगत देऊळ आहे.
स्वतंत्र मंदिर न मिळाल्यास कोणत्याही दाक्षिणात्य मंदिरातील मुरुगनस्वामींचे दर्शनही घेऊ शकता. (मुरुगन म्हणजेच कार्तिकेय.)

तसेच नासिक रोड विहीत गाव येथील श्री अण्णा गणपती नवग्रह सिद्धपीठम येथे कार्तिकस्वामींचे सुरेख मंदिर आहे. येथे भक्तांनी आवर्जून भेट द्यावी.

श्रीप्रज्ञाविवर्धन स्तोत्र

अस्य श्रीप्रज्ञाविवर्धन-स्तोत्र-मंत्रस्य सनत्कुमारऋषि:।
स्वामी कार्तिकेयो देवता। अनुष्टुप् छंद:।
मम सकल विद्यासिद्ध्यर्थं जपे विनियोग:।
श्रीस्कंद उवाच।।
योगीश्वरो महासेन: कार्तिकेयोSग्निनन्दन:।
स्कंद:कुमार: सेनानी: स्वामिशंकरसंभव: ।।१।।
गांगेयस्ताम्रचूडश्च ब्रह्मचारी शिखिध्वज:।
तारकारिरुमापुत्र: क्रौंचारिश्च षडानन: ।।२।।
शब्दब्रह्मसमुद्रश्च सिद्ध:सारस्वतो गुह:।
सनत्कुमारो भगवान् भोगमोक्षफलप्रद: ।।३।।
शरजन्मा गणाधीशपूर्वजो मुक्तिमार्गकृत।
सर्वागमप्रणेताच वांछितार्थप्रदर्शन: ।।४।।
अष्टाविंशति नामानि मदीयानीति य: पठेत्।
प्रत्यूषं श्रद्धयायुक्तो मूको वाचस्पतिर्भवेत् ।।५।।
महामंत्रमयानीति मम नामानुकीर्तनम्।
महाप्रज्ञामवाप्नोति नात्र कार्या विचारणा ।।६।।
इति श्रीप्रज्ञाविवर्धन स्तोत्रं संपूर्णम्।।

*** सर्वांनी या दर्शनपर्वणीचा लाभ घ्यावा ***