चाळीसगावच्या लेकीची 'अवकाश'भरारी

चाळीसगावच्या लेकीनं मारली आहे अंतराळ क्षेत्रात भरारी. नासाच्या विमानांच्या डिझाईनसाठी चर्चेत आलेल्या स्वीटी पाटेनं आता एक नवं स्पेस शटलचं डिझाईन तयार केलं आहे. त्यामुळे ५० प्रवासी अंतराळात एकाचवेळी जाऊ शकणार आहेत.

चाळीसगावची स्वीटी पाटे…वय अवघे 20 वर्षे…अमेरिकेतल्या एरोनॉटिक्स आणि अॅस्ट्रोनॉटिक्स फाऊंडेशनच्या स्पर्धेत स्वातीनं तिसरा क्रमांक मिळवला आहे. तिच्या या स्पेस शटलचं नाव आहे ‘क्षितीज वाहक’.

या स्पर्धेत जगातल्या ६५ विद्यापीठातल्या १०० टीम्सनी भाग घेतला होता. ‘स्पेस 2012’ या स्पेस रिसर्चकॉन्फरन्समध्ये स्वीटीनं आपलं हे संशोधन जगासमोर मांडलं. या आधीही स्वीटीनं नासामध्ये आपल्या कर्तबगारीचा झेंडा रोवला आहे. डॉल्फिनच्या आकाराचं, कमी इंधनावर चालणारं आणि किमान धावपट्टीत उतरणाऱ्या विमानाचं डिझाईन स्वीटीनं तयार केलं होतं. इतकंच नाही तर स्वीटीनं मानवरहित कार्गे विमानाचं डिझाईनही तयार करून नासाला पाठवलं आहे.

आपल्याला अंतराळात प्रवास करता येईल का या एका प्रश्नानं झपाटलेल्या मुलीचा हा आतापर्यंतचा प्रवास थक्क करणारा आहे आणि अनुकरणीयही आहे…

अंतराळ संशोधनात स्वीटी पाटेची झेप :

कल्पना चावला आणि सुनीता विल्यम या महिलांनी अंतराळ क्षेत्रात मोलाची कामगिरी केल्यानंतर आता त्यात भर पडली आहे जळगाव जिल्ह्यातील चाळीसगावच्या स्वीटी पाटे या तरुणीची.अंतराळ संशोधकांच्या रांगेत चाळीसगावची स्वीटी पाटे ही जगातील एकमेव महिला ठरली आहे. स्टड्ढॅटोस – २ प्लस या रॉकेट संशोधनात तिने मोलाचा वाटा उचलला आहे. स्वीटी पाटे हिच्या या संशोधनकार्यामुळे महाराष्ट्राची मान उंचावली आहे.यूरोपियन विद्यापीठाच्या एअरोस्पेस अभियंत्रिकी विद्यार्थ्यांच्या ४० जणांच्या टीमने हे रॉकेट विकसित केले असून त्यात स्वीटी ही एकमेव महिला होती. हे रॉकेट स्पेनच्या स्पॅनिश स्पेस एजन्सीतून शुक्रवारी रात्री ८ वाजता यशस्वीपणे अवकाशात झेपावले असून त्याची नोंद जगभराने घेतली आहे. या यशस्वी प्रयोगामुळे स्वीटीने जागतिक विक्रमाची नोंद केली आहे.